Isumat.com/Marso 10, 2022
Depresyon tungod han problema han ira pamilya an nakagduso hin usa nga babaye nga utdon an iya kalugaringon nga kinabuhi ha Tacloban City kakulop, Marso 9, 2022.
Subay han imbestigasyon han Tacloban PNP, ginkilala an biktima nga hi Rachel Mondido, 21 anyos, ngan residente han Utap District.
An mga kapulisan in nakakarawat hin tawag ha telepono kun diin may nagsumat nga mayda nakit-an nga babaye nga nabitay ha usa nga puno hin kahoy ha Trece Martires St, Port Area, luyo han Gran Hotel Building.
Dida han imbestigasyon, nagsumat an mga kasangkayan han biktima nga dida han udto nagka-urusa pa hira hin pangaon ngan katapos hadto ira na-obserbaran nga nagpipinamiling hin higot an biktima.
Han matad-an an patay nga lawas han mga imbestigador, nasabtan nga taklap an iya gingamit paghigot han iya liog ngadto han puno nagresulta han iya kamatay.
Nagsering pa an mga kasangkayan ni Mondido nga nagkaada hin dako nga problema an biktima kay an iya una nga asawa in nagkikinastigo daw ha iya ngan nagbulag hira. Nagkaada hin bag-o nga kalungon an biktima, pero napreso liwat an lalaki. Tungod hini, nagkaada hin depresyon an ira barkada, sering pa han mga barkada han biktima.
Nakumpirmar gihapon han kapulisan an istorya han mga barkada nga nagamit hin rugby an nagpakamatay kay dida han crime scene, ira pa nakuha an rugby nga amo daw an gingiginamit ni Mondido. #
