Isumat.com/Enero 31, 2023
Naawat an kinabuhi hin 20 katawo denhi ha Rehiyon Otso hadton 2022 tungod han sakit nga dengue, subay han pahayag han Regional Epidemiology and Surveillance Unit han Department of Health Regional Office.
Tungod hini, utro an mahugot nga pahimatngon han DOH ha publiko nga himoon gud an ngatanan nga pitad kontra han dengue kay padayon an pagtikahitaas han mga kaso. Sering pa han ahensya, kinahanglan doblehon pa an paghirot labi na nga nagpapadayon an pag-uuran nga nagigin kawsa han pagbi-aw han tubig ha magkalainlain nga dapit nga puede magin pugad han dengue.
Sumala han DOH, nakaka-alarma ini nga ihap han mga nagkamamatay kay hadton 2021 zero casualty an Eastern Visayas, pero han 2022, nagkamay-ada hin 20 nga namatay dara hini nga sakit.
Gulpi gihapon an paghitaas han kabug-usa nga ihap han nagkatatapnan kay hadton 2021, an nahipatik nga kaso in 877 la, kumparar han 2022 nga 6,794.
Igindugang pa han report, nga han yana nga bag-o nga tuig, mayda na 210 nga kaso hin dengue ha Rehiyon Otso kun diin 190 an na-admit ha hospital. Dida hini nga mga kaso, 84 an tikang ha Leyte.
Tungod hini, ginkakabarak-an han departamento nga posible padayon an pagsirit tipa-igbaw han lista kay segi man la gihapon an pag-uuran ngan pagbabaha hin kadam-an nga parte han rehiyon.
Kasumpay hini, an DOH in hingpit an panawagan ha ngatanan nga Local Government Units ug ha katawhan nga himoon an masunod nga mga pitad nasi masurapo ini nga sakit : Syahan, kada alas 4 han kulop, magdumara hin pamiling han surok han namok ngan pukanon ini. Kinahanglan limpyuhan an mga burutangan hin tubig ngan huwaron an mga nabi-aw nga tubig hin pira na ka adlaw.
Ikaduha, kinahanglan ig-aktibar an Barangay Dengue Brigade ngan kada semana magka-urusa an bug-os nga barangay para han search and destroy activity.
Iginsasagdon gihapon nga kadagmitan magpakunsulta ha health centers kun may mga sintomas sugad han pag-ul-ol han tiyan, pagsugpa hin dugo, pagsinuka ngan panluya han lawas ngan kaluluthan.
Angay gihapon makigsumpayan ha LGU basi magdumara hin upat ka semana nga sagunson nga fogging operations ha tagsatagsa nga barangay. #
