Isumat.com/8:03AM, December 14, 2020

Duha nga kalalakin-an an binawi-an hin kinabuhi ha magkalain nga insidente hin panmusil ngan aksidente hin motorsiklo ha Calbayog City ngan Tacloban City kakulop, Disyembre 13, 2020.

Didto ha Brgy Canjumadac, Calbayog, namatay hi Paquito Fuenteblanca, 62-anyos; ngan nasamad hi Jona Eyano, 22-anyos, han paarakan hira hin bala han mga suspetsado kakulop didto mismo han panimalay ni Fuenteblanca.

Tigda la umulpot ha balay han biktima an mga suspetsado nga hira Edgar Elbano, Jimboy Tomnob, Dennis Onate ngan Bordallo Abria ug nagpabuto. Dead on the Spot hi Fuenteblanca ngan gindara ha hospital ug aada yana ha kritikal nga kahimtang hi Eyano.

Umiskapo an mga suspetsado katapos han panhitabo pero nakilal-an hira han mga testigos. Nakuha dida han lugar an mga basiyo hin bala hin kalibre 5.56mm ngan 45 nga pistola. Gin-iimbestigar gihapon an motibo han krimen.

Ha Tacloban City, namatay hi Feleciano Matados, 33-anyos, residente han Brgy 107, Sta Elena han ma-aksidente hiya samtang nagmamaneho han iya motorsiko didto han nasabi nga lugar.

Pasado alas 7 han gab-i, samtang nagmomotor hiya ha barangay road, mayda niya gin-insimahan nga behikulo. Dida hito nga takna, nawarayawan hiya kontrol han manibela ngan sumampak ngadto han gutter han kalsada.

Tungod han kakusog han pagbangga han motor ha gutter, nahilabog hiya ngan namalmal an iya ulo ha semento. Gindara ha EVRMC an biktima pero gindeklarar nga Dead on Arrival han doktor. #