Isumat.com/8:09AM, December 4, 2020

Duha ka tawo an naawat an kinabuhi ngan pira pa nga iba an nagka-iigo hin bala ha magkalainlain nga panhitabo hin panmusil, aksidente nga pakapusil, ngan kalumos ha iba-iba nga parte han rehiyon.

Didto ha Calbayog City, an habal-habal driver nga hi Rio Sabilao, 39 anyos, in namatay han pagpusilon hin waray hikilal-i nga suspetsdado samtang nagmamaneho han iya motorsiklo kakulop ha Brgy Patong.

Nagkasasamdan naman an mga pasaheros han motorsiklo nga hira Virginia Semino, Zenaida Fermeno ngan usa nga 14-anyos nga batan-on. Waray pa katutudlok kun hin-o an suspetsado ngan an motibo han krimen.

Usa naman nga 8-anyos nga lalakihay an naigo hin bala han aksidente nga makablit han iya kamulay nga menor de edad gihapon in usa nga improvised gun (Boga) ha Brgy Hugpa, Ormoc City, kakulop han udto.

Subay han imbestigasyon, an nagdadara han pusil amo an 16-anyos nga sangkay han suspetsado ngan biktima. Ini nga nagdadara han armas in nanmumusil hin katamsihan, pero nakakita hiya han iya mga kamulay nga nangangarigos ha Panalian River.

Iya iginbutang ha tuna an pusil ngan kumarigos liwat. Ginpurot han suspetsado an armas ngan nakablit ngan bumuto ini ug na-igo an otso anyos nga ira kamulay. Gindara an biktima ha hospital basi tambalon. Ginkustudiya han kapulisan suspetsado ug an armas para han kaangayan nga disposisyon.

Natad-an naman an patay nga lawas kakulop hin usa nga lalaki nga gintotoohan nalumos ha Palo, Leyte.

An 15-anyos nga biktima in nahisumat nga nawawara ha Aloha Beach Resort duha na ka adlaw an nakalabay ngan kakulop an mga search and rescue team an nakadiskubre han patay nga lawas. #