Isumat.com/Hunyo 3, 2021

Natad-an han mga rescuers an duha nga patay nga lawas nga gintotoohan nagkalulumos dida han tigda nga pagbabaha tungod han makusog nga uran nga iginpusdak ni Bagyo Dante ha Calubian Leyte.

Dida han Martes (Hunyo 1) nagbabaha ha pira nga parte han bungto ug pira ka tawo an igin-anod han makusog nga agos han baha.

Syahan nga nakit-an an lawas ni Joselita Montemor, 51 anyos ngan residente han Brgy Casiongan. Iginreport nga pinanginginano han biktima an iya hayupan nga baboy han madara hiya han baha ngan malumos.

Pagka alas 5 han kulop (Hunyo 2) natad-an naman an patay nga lawas han 7-anyos nga lalakihay ha Brgy Padoga. An iya bugto nga 2-anyos in ginpipinamiling pa tobtob ginsusurat ini nga notisya.

Naghahangyo naman hin ayuda an LGU-Calubian sugad hin relief goods ngan mga used clothing basi ighatag ngadto han mga pamilya nga apektado han flashflood.#