Naawat an mga kinabuhi hin duha nga kaapi han rebelde nga New People’s Army (NPA) ngan usa nga tropa han gobyerno dida hin engkwentro ha butnga han magkaluyo nga grupo ha Pinabacdao, Samar, kakulop han aga, Marso 11, 2020.

Sumala han report nga nasagap han Isumat.com, nagbubuhat hin operasyon ha Brgy Canlobo, Pinabacdao an mga elemento han Intel Platoon han 46th Infantry Batallion han Philippine Army han igkahibalag hira hin porlomenos napulo nga mga rebelde. Dida hini, nagkaada na hin pinusilay an duha nga panig nga hinmagos hin 17 minutos. An mga rebelde nga komunista in kinmalagiw tikadto ha kabukiran katapos han engkwentro.

Namatay dida han balyu-ay hin bala in duha nga kaapi han NPA ug an ira mga patay nga lawas in aada ha kustudiya han mga kasundaluhan. Usa naman nga miembro han Phil Army an binawi-an gihapon han kinabuhi. Samtang ginsusurat ini nga balita, an Philippine Army in waray pa maghatag han mga ngaran han mga nagkamamatay.

Narekober han mga tropa han gobyerno dida han lugar han pag-awayan in usa nga M-16 rifle, usa nga backpack, battery hin solar panel, duha nga cellphones, ngan pira ka magazine hin bala.#