Isumat.com/Pebrero 7, 2022
Nagkasisikmit han mga kapulisan in duha ka tawo nga lakip han grupo nga responsable pagpatay hin tulo ka tawo ngan kasamad hin usa pa dida han Pebrero 6, 2022 ha Sta Margarita, Samar.
Ha panmaki-ana han iFM-RMN Tacloban, iginbuyagyag ni Sta Margarita Police Chief Lt Lorben Deraco nga naghimo dayon hira hin hot pursuit operation ngan kanina han maagahon (Pebrero 7) nakadakop hira hin duha nga suspetsado han krimen.
Kun manunumduman, pasado alas 6 han aga hadton Pebrero 6, may natabo nga ambush ha Brgy Roxas han nasabi nga bungto kun diin nagkamamatay hira Pedi Deborbon, Junjun Deborbon ngan Ernesto Doinog samtang nasamad ngan nakatalwas hi Gerry Deborbon.
Nagsering hi Deraco, may mga testigos nga positibo nakakilala han mga gintatahapan sanglit nakaghatag ini hin giya ha mga otoridad basi madakop an duha nga suspetsado.
Iginbuyagyag gihapon han opisyal nga unom ngatanan an mga suspetsado ngan ginhahalpat pa nira an upat. Pero waray la anay igpasamwak han hepe an mga pangilal-an han mga suspetsado kay bangin ma-apektaran an ira ginhihimo nga operasyon.
Nagsumat gihapon hi Deraco nga ngatanan han mga suspetsado in may gin-aatubang nga kaso nga murder ngan homicide ngan mayda iginpalusad nga mga arrest warrant kontra ha ira hanhadi pa ugaring la makuri magkadadakop kay adto hira naglilinook ha tay-aw nga kabubkiran han bungto.
Bisan ngani an usa han mga biktima nga hi Junjun Deborbon in may gin-aatubang gihapon nga kaso kriminal, pahayag pa ni Deraco.
Dida gihapon han nasabi nga interview, iginsaysay ni Deraco nga mayda mga Private Armed Group didto han bungto nga nagigin aktibo labi na kun panahon han eleksyon.
Partikular nga gintudlok han hepe an Deborbon Group nga pinangungunahan ni Arturo Deborbon ug an Manas Group nga an lider amo hi Alfred Manas.
Kadungan hini, iginpasarig han opisyal nga deri hira mahunong tobtob han pagkadadakop han mga suspetsado han ambush sugad man han ngatanan nga miembro hini nga mga grupo dida han munsipalidad.
Sering pa ni Deracol, dako an posibilidad nga magkadadakop na ini nga mga suspetsado kay mayda iginpadara nga usa ka batalyon hin Army tikang ha Mindanao basi bumulig pagbungkag han mga armado nga grupo ha Samar.
Gintotoohan nga may kalabutan ha pulitika an madugo nga panhitabo hadin Sabado kay an mga biktima in gintutudlok nga mga lideres ngan supporters ni Emil Zosa nga kandidato ka alkalde han bungto.
Nagpahayag pa hi Deraco nga tobtob yana, deri pa nira nakukumpirmar kun may mga pulitiko o hira hin-o nga pulitiko an nagbabayad para han serbisyo hini nga mga private armed groups. #
