Isumat.com/Agosto 19, 2021
Paghagos la hin pira ka adlaw katapos han aragway ha Dolores, Eastern Samar ha butnga han militar ngan New Peoples Army, nagkaada na liwat hin enkwentro an duha nga panig ha Southern Leyte, kakulop, Agosto 18, kun diin namatay in duha nga rebelde ngan usa nga sundalo.
Dida han report han Philippine Army, an mga tropa han gobyerno in mayda patrolya ha kabubkiran han Brgy Lawgawan, Bontoc, Southern Leyte han igkasurapo hira han mga terorista pasado alas 11 han aga.
Nagbalyu-ay hin bala an duha nga grupo ha sulod hin usa ka oras nga nagresulta han kamatay han duha nga kumunista ngan usa nga militar. Usa pa nga sundalo an nasamad ngan yana gintatambal ha hospital.
Nagtotoo naman hi Lt Col Ernesto dela Rosa, 14 Infantry Battalion Commander, nga deri la duha an namatay ha panig han mga rebelde.
Gintotoohan nga an mga rebelde in kaapi han 1st Platoon, Island Levox Committee han CPP=NPA-NDF Eastern Visayas.
Nakuha han militar dida han lugar han pag-agwayan in usa nga M-16 rifle, tulo nga backpacks, napulo nga tents ngan personal nga mga higamit.
Kun manunumduman, tulo pala ka adlaw an nakalabay han pagsulungon han militar an kampo han NPA ha Brgy Osmena, Dolores, Eastern Samar kun diin namatay in 19 nga mga rebelde nga kumunista. Gintotoohan nga hirimo-an hin bomba han NPA an nasabi nga kampo. Waray nasamad o namatay ha panig han gobyerno dida hini nga panhitabo. #
