Isumat.com/Enero 9, 2023
Usa nga lalaki an patay ha waray hunong nga panmatay ha Calbayog City ngan problema ha paghiguma an gintutudlok nga rason han pagpakamatay hin lalaki ha Biliran.
Ha report nga nahikay han IsumatNews, nagbabaktas ha kalsada ha Brgy Hamorawon, Calbayog City an biktima nga hi Alvin Lemorenas, 26 anyos han pusilon han mga waray panhikilal-i nga suspetsado pasado alas 9 han aga, Enero 8, 2023.
Namatay an biktima tungod han mga igo hin bala ha iya lawas, samtang an mga suspetsado in kadagmitan kumalagiw sakay hin motorsiklo.
Ini nga insidente in padayon gin-iimbestigar han kapulisan basi matudlok an mga gintatahapan ug an motibo han pagpatay han biktima.
Didto naman ha Naval, Biliran, iginreport an pagpakamatay hin lalaki ngan gintutudlok an problema ha paghigugma nga rason han iya pag-suicide.
Ginkilala an biktima nga hi Rene Tropil, 38 anyos, empleyado hin pribado nga kompaniya ngan residente han Brgy Caraycaray han nasabi nga bungto.
Alas 7:30 han aga, Enero 8, 2023, nadiskubre han mga paryente han biktima nga nabitay an iya lawas didto han ira balay.
Iginsumat han iya mga paryente nga posible nag-antos hin depresyon an biktima kay ginbayaan han iya asawa nga gin-aalegar umupod hin iba nga lalaki. #
