Duha nga kalalakin-an an nagtiwas han ira kalugaringon kinabuhi tungod hin magkalain nga rason ha Eastern Samar ngan Ormoc City hadin nag-agi nga adlaw.
Subay han report, hi Reynaldo Racaza, 33 anyos ngan nag-uukoy ha Brgy Maslog, Lawaan Eastern Samar in naghikog gamit an nylon cord samtang naka-kwarentina hiya.
An biktima in igin-kwarentina han magin close contact hiya hin nagpositibo han Covid. Ini an gintutudlok nga rason han pamilya kun kay-ano nag-suicide hi Racaza. Kakulop, Hunyo 9, gumawas an resulta nga usa hiya han 15 katawo nga natapnan han virus didto han nasabi nga bungto.
An mga imbestigador in nagpahayag nga waray hira nakita nga foul play dida han insidente.
Samtang, didto naman ha Ormoc, an deri pagka-asya ha iya oyab amo an posible nga hinungdan han pagkamatay ni Carlito Laurente Jr.
An 19 anyos nga biktima in residente han Brgy Labrador han mao nga syudad.
Nagsumat an bugto ni Laurente nga nakabati hiya hin buto hin pusil tikang ha kwarto han biktima ngan didto nira nakit-an an lawas ni Laurente nga may igo hin pusil. Natad-an gihapon didto an 38 kalibre hin pistola nga gingamit pag suicide.
Antis ini nga panhitabo, nagkaada hin deri pagkasabot ug nag-away an biktima ngan han iya oyab ha facebook messenger, ug ini an posible nga rason han pagpakamatay, pahayag pa han pamilya han biktima. #
