Isumat.com/Agosto 26, 2021
Dako an paglaum han militar nga mabubungkag na an politico-militar nga infrastractura han CPP-NPA ha probinsya han Leyte tungod han pagsurender hin duha nga miembro han “kangaroo court” han mga kumunista nga rebelde.
Dida han iginpagawas nga pahayag han Philippine Army, nagsurender an mga rebelde ngadto ha 93rd Infantry (Bantay Kapayapaan) Battalion han 8th Infantry Division.
Ginkilala an mga miembro han “kangaroo court” nga hira alyas Jun ngan Alyas Kakay. Upod han ira pagsurender amo hi alyas Tor nga nagsumat nga usa hiya nga “spotter” han kanan NPA Liquidation Squad SPARU. Nagtubyan hira hin tulo nga kalibre .45 ngan mga bala ngadto han militar.
Hira alyas Jun ngan alyas Kakay in nagbuyagyag nga hi Boy Caliwan alyas Kumander Apoy an nagtudlok ha ira nga magin kaapi han kangaroo court bisan kun waray hira igpa-ilarum hin insakto nga pag-aradman han pagdumara han tinatawag nga “revolutionary justice system” han terorista nga hugpo.
Ira pa iginsumat nga hira an nagpalusad han sirot nga kamatayon hin usa nga nagngangaran nga Tonyo kataliwan la nga igreklamo ini ha ira hin usa nga Barangay Kapitan. Nagpahayag pa hira Jun ug kakay nga miembro hira anay han Upland Farmers Association ha Carigara antis hira tudlokon para han kangaroo court.
Ha luyo nga bahin, hi alyas Tor in nag-angkon nga hiya an spotter han mga rebelde nga nagpatay kan Army Corporal Erwin Niegas hadton 2015.
Kasumpay hini, hi Brig General Zosimo Oliveros, Commander han 802nd Brigade, in nanawagan ha katawhan nga magka-urusa hin pag-aro hin hustisya para han mga biktima han deri makatawo ngan brutal nga pamaagi han kanan NPA “revolutionary justice system.”
