Image by Phillipine Star

Isumat.com/Hunyo 4, 2022

Nakakumpiskar an Philippine Drug Enforcement Ageancy-Eastern Visayas hin iligal nga droga nagkakantidad hin 2 Milyones pesos ha sulod hin tulo la bulan nga mga operasyon ha bug-os nga rehiyon.

Iginpahayag han ahensya nga sobra 300 gramos an kabug-usan nga timbang han nasabi nga illegal drugs nga narekupo tikang Enero 22 tobtob Abril 21, 2022.

Dida han PDEA chemistry report, an shabu in kantidad hin 600 pesos kada gramo, samtang an pinamara nga dahon han marijuana in tag 350 pesos an gramo.

kadungan hini, utro nanawagan an PDEA ha publiko nga deri gud mag-pruweba pagsulod hini nga iligal nga aktibidad kay perde an kinabuhi kun mahidadabi hini.

Samtang, dida han Hunyo 2, 2022, usa nga drug personality an na-aresto ha buy-bust operation ha Brgy Maglipay, Sulat, Eastern Samar.

Ginkilala an suspetsado nga hi Rolando Napal kun diin nakumpiskar tikang ha iya an gin-aalegar nga shabu balor hin 5,450 pesos. Hi Napal in gintutudlok nga High Value Target dida han probinsya.

An nagdumara han operasyon amo an mga operatiba han PDEA-Eastern Samar, Provincial PNP Office ngan Sulat Municipal PNP Station. #