(File photo by inquirer.net)

Isumat.com/ Nobyembre 30, 2022

Patay in duha nga gin-aalegar drug suspects han umato hira ha mga otoridad dida han gindumara nga buy-bust operation ala 1:45 han maagahon, Nobyembre 29, 2022 ha Sesami St, Brgy Cogon, Ormoc City.

Ginkilala an mga namatay nga hira Paulo Sedara, 42, taga Brgy Naungan, Ormoc samtang an usa in hi alyas “Cabahug.”

An mga pwersa han Ormoc City Police ngan PDEA in naghimo han operasyon kun diin narekupo gihapon an iligal nga droga may timbang nga 120 gramos ngan nagkakantidad hin sobra 800 Mil pesos.

Ha report han kapulisan, naka-abat an mga suspetsado nga an ira ka-transaksyon in mga tinubyanan han balaud, sanglit ginbulnot han mga gintatahapan an ira pusil ngan nakigbalyu-ay hin bala. Dida han purupsilay, naigo an duha nga suspetsado rason han ira kamatay.

Samtang, upat nga suspetsado an nadakop ngan 102 Mil pesos kantidad hin iligal nga droga an narekupo han mabungkag han mga otoridad in usa nga drug den ha Purok 2, Brgy Bagacay, Calbayog City hadton Nobyembre 26, 2022.

An mga suspetsado in ginkilala nga hira Elmo Valius, nga amo an gintutudlok nga nagdudumara han drug den; ug an mga bisita didto han mao nga lugar nga hira Susan Senilla, John Edsel Valius ngan Edilberto Senilla.

An mga suspetsado in aada ha kustudiya han Calbayog City PNP ngan maatubang hin mga kaso tungod han ira pakatalapas han Comprehensive Dangerous Drugs Act of 2002. #