Isumat.com/Enero 26, 2022
An super-typhoon Odette in nagbaya hin 19 Bilyones pesos nga kantidad hin distroso ha Southern Leyte, sumala kan Gobernador Damian Mercado.
Ha notisya tikang ha Philippine Information Agency-Region 8, hinsabutan nga an Provincial Government in natapos na han ira assesment o panginano, ngan subay han report han ngatanan nga natutungdan nga ahensya, balor hin 19 bilyones an danyos han bagyo nga naglapingka han probinsya ngan iba pa nga mga lugar hadton Disyembre 16, 2021.
Iginsumat ni Mercado, nga an DPWH in nag-report hin 1.5 bilyon nga distroso ha mga pampubliko nga infrastraktura, samtang an balor han nagkaguguba nga kabablayan in 10.5 bilyon, ug kantidad naman hin 1.5 bilyon an mga facilidadis han Department of Education nga nadistroso.
Para naman han agrikultura, an danyos in balor 1 bilyon pesos. Dida hini, naabot hin 6.5 milyon an balor han kalubi-an nga ginsiphid han bagyo.
Sering han gobernador, an lubi an panguna nga produkto han probinsya, sanglit kinahanglan matagan hira dayon hin ayuda basi makatindog ini nga industriya.
Kasumpay hini, an Philippine Coconut Authority in nagpatapod nga makuha hira hin 20 Mil nga coconut seedlings ha Cotabato ngan Zamboanga basi dad-on ha Southern Leyte ngan mahitanom ha gilayon han mga para-uma hin lubi. #
