Isumat.com/8:40AM, July 24, 2020

Nangangandaman yana an probinsya han Eastern Samar han nakatalaan nga pag-abot hin 173 nga mga Locally Stranded Individuals (LSI) tikang ha Metro Manila.  Nagsering an Presidential Management Staff nga hiton Hulyo 26, magkakalakat ha Manila ini nga mga LSI nga magkaka-uli ha Sinirangan Samar.

Dida hito nga adlaw, magkaka-ada hin send-off ha Rizal Stadium para hini nga mga LSI ha ilarum han Hatid Tulong Initiative han gobyerno.

Nangunguna ha listahan an Dolores kun diin 35 an maabot nga LSI, samtang an Borongan City ngan Guiuan in mayda tag-17 an magkakabalik nga residente. I4 naman an taga Llorente, ngan 11 ha bungto han Oras.

Ngatanan han mga munisipalidad han lalawigan in mayda magkaka-uli, labot han Maslog nga waray mabalik nga residente.

Ha luyo nga bahin, hi Governor Ben Evardone in nagpadangat hin hangyo ha Inter-Agency Task Force nga suspenderon la anay an pagkarawat han probinsya hin mga LSI ngan OFW tinikangan hiton Hulyo 27 ngan mahagos ini hin duha ka semana.

An hangyo ni Evardone an iya iginpamatak han rekomensayon han Provbincial Health Office para han duha ka semana nga suspension tungod kay deri makaka-akomodar an mga Quarantine ngan Isolation Units han probinsya kay okupado pa ini hapagkayana.

An Eastern Samar in COVID-Free yana kay naka-recover na an duha nga pasyente nga natapnan han virus. Amo gihapon ini an probinsya ha Region 8 nga may pinakahabubo nga kaso han virus tungod kay duha la an nagkatatapnan tobtob yana.

Ha bug-os nga Eastern Visayas, haros 70% han mga nagkatatapnan amo an mga LSI ug ginkakabarak-an ini nga amo an makagbutho hin pagdamo han kaso ha Eastern Samar kay 173 ini nga maabot ha ira sunod nga semana. #