Isumat.com/1:43PM, September 03, 2020
Tobtob yana nga mga panahaon, padayon an pagtikadamo han nagkakatatapnan han Covid-19 nga mga Health Workers ha Eastern Visayas ngan ha Eastern Visayas Regional Medical Centers aada na ini ha 150.
Nag-asoy hi Dr. Amelita Avenido, tagpamulong han EVRMC, nga didto ha EVRMC-Bagacay ngan EVRMC Magsaysay, 154 na ngatanan an natapnan. Dida la ngani han nakalabay nga duha ka adlaw, 52 nga EVRMC Personnel an nagpositibo han ginkakahadlukan nga kagaw. Pero ginklaro ni Avenido nga lapos katunga han natapnan in naka-recover na ug an iba bumalik na ha trabaho.
Hi Avenido in nagklaro gihapon nga an mga natapnan ha EVRMC-Bagacay in nakakuha ha virus ha gawas han hospital tungod han local transmission. Pero han paki-anhan hiya kun kay-ano nga nagkatatapnan an mga personales ha EVRMC-Magsaysay, waray hiya makaghatag hin klaro nga surok han virus. An EVRMC-Magsaysay amo an referral hospital para han Covid Patients ngan suspetsado nga nagdadara han kagaw.
Igindig-on han doktor nga ira man ginsusunod hin tim-os an mga health protocols pero nakakalusot la gihapon an virus ngan naa-alakbatan an ira mga personales ha Magsaysay.
Iginsumat naman ni Avenido nga hapagkayana, mayda 45 nga Covid Patients ngan mayda 105 nga pasyente nga may sakit nga Severe Acute Respiratory Illness (SARI) an gintitimamangno ha EVRMC-Magsaysay.#
