Isumat.com/7:32AM, November 2, 2020

Samtang nagtitikaharani an Pasko ngan bag-o nga tuig, ginbabanabana nga magtitikadamo pa an mangunguli nga katawhan tikang ha Metro Manila ngan pira nga parte han Luzon nganhi ha Sinirangan Bisayas.

Tinikangan yana nga adlaw, Nobyembre 2, ma-arangkada na an biyahe hin 154 nga pampasahero nga bus tikang ha Sta Rosa Integrated Terminal ha Laguna tipakadto ha magkalainlain nga destinasyon ha Rehiyon Otso.

Dida han Memorandum Circular No. 2020-051-B nga iginpagawas han Land Transportation Franchising and Regulatory Board (LTFRCB) han Uktubre 30, aabrihan na an biyahe para han masunod nga mga ruta: Sta Rosa – Tacloban City; Sta Rosa – Ormoc City; Sta Rosa – Palompon, Leyte; Sta Rosa – Maasin City; Sta Rosa – Catarman; ngan Sta Rosa – Laoang, Northern Samar.

Mahugot gihapon an kamanduan han LTFRB nga waray umento han pamasahe. Kun pira an kantidad antis an pandemya, amo la gihapon an susukton yana.

Hingpit gihapon nga igpapatuman an Health Protocols sugad han Social Distancing, pagsul-ot hin face mask ngan face shield, deri pagpasakay han may sintomas han COVID-19, pagderi han pag-iristorya ngan pagkaon ha sulod han bus, ngan maupay an bentilasyon han sarakyan.

Mumultahan ngan puede kanselaron an prangkisa han mga bus operators kun masasabtan nga makakatalapas han mga patakaran. #