Isumat.com/8:28AM, Enero 19, 2021

Naglugaring pag-utod han iya kinabuhi in usa nga Grade 8 nga estudyante ha Basey, Samar tungod han gin-aalegar nga ginbinusaan hiya han iya amay.

Sumala han report han Basey PNP, an 14 anyos nga babaye in nagpakamatay pinaagi hin paghigot han iya liog ngadto han alkoba han ira balay ha Brgy San Antonio hadin nakalabay nga adlaw.

Antis ini matabo, gin-isgan han iya tatay an daragahay tungod han pag-inupod-upod hin paglalakat han iya kasangkayan. Ginsagdunan pa an biktima nga mas maupay lugod kun tagan hin atensyon an iya pag-istudyo.

Kataliwan hini, sumulod ha iya kwarto an biktima ngan naghikog pinaagi hin nylon cord. Nadiskubre han pamilya an nabitay nga lawas han biktima alas 5 han maagahon. Gintalinguha pa nga madara ha hospital pero gindeklarar nga patay na an estudyante.

Iginpahayag pa han report nga nagbilin hin suicide note an biktima para han iya pamilya ug ha iya oyab. #