Isumat.com/3:03PM, August 29, 2020
Usa ka bulan nga General Community Quarantine (GCQ) para han Northern Samar an karuyag ig-implemerntar ni Gobernador Edwin Ongchuan didto han probinsya nga iya nasasakupan.
Hi Ongchuan in nagpadara na hin kumunikasyon ha Regional Inter-Agency Task Force kun diin iya gin-aaro an usa ka bulan nga GCQ ha Northern Samar dara han kumpirmado nga Local Transmission han virus ug an hitaas nga posibilidad nga damo an iginka-urusa nga katawhan han tawo o mga tawo nga nagpositibo han ginkakahadlukan nga kagaw.
Hadin Mierkules, iginpasamwak ni Northern samar 1st District Congressman Paul Daza nga nagpositibo hiya han virus ngan antis hiya mag-kwarentina ha Catarman, nagsudoy-sudoy pa hiya han mga lugar nga iya nasasakupan ngan damo nga mga opisyal ngan mulopyo an iya iginka-urusa. Hi Daza in aadto na yana naka-confine hin usa nga hospital ha Manila. Ginklaro han magbabalud nga deri hiya maaram nga positibo hiya kay antis hiya umuli ngadto ha Catarman, negatibo man an resulta han iya swab testing ha Manila.
Pira pala ka adlaw an nakalabay, nagdumara gihapon hin birthday party an anay mayor han bungto han Allen kun diin gintambungan ini hin damo nga mga bisita ngan nagkaada liwat hin katitirok in usa nga kooperatiba dida han bungto nga naghimo hin raffle draw.
May mga impormasyon nga nagpositibo han virus an nag-birthday nga ex-mayor ug an iya live-in partner . Hinungdan hini, porlomenos 500 katawo an naka-kwarentina yana ha Allen ug kadam-an ginkuhaan na han swab sample ngan naghuhulat han resulta.
Kakulop, Agosto 28, iginreport han DOH an 13 ka tawo nga nagpositibo ha Catarman ginkokomponer hin usa nga Health Worker ngan 12 nga close contacts hin kumpirmado nga natapnan han virus. Waray igpahayag han report kun hin-o ini nga Confirmed Patient an iginka-urusa han bag-o nga nagkatatapnan.
Iginreport gihapon han DOH an usa nga lalaki nga nag positibo ha bungto han San Isidro nga close contact gihapon hin naha-una nga natapnan han Covid.
An Catarman Doctors Hospital in nagpasamwak nga sarado an hospital tobtob Setyembre 3 kay nagpositibo an usa nga ira empleyado ngan magdudumara hira hin contact tracing ngan disinfection.
Nag-abiso naman naman an Diocese of Catarman nga usa han ira Padi an nagpositibo han virus sanglit ginpapa monitor gihapon an mga indibiduwal nga iginka-urusa han Padi.
Hapagkayana, an Northern Samar in nagkaada na hin 80 nga kaso han Covid-19.
An Eastern Visayas in aada na yana ha GCQ tobtob Setyembre 11, pero kun aprobaran an hangyo han Northern Samar, tobtob pa ha Setyembre 25 an implementasyon han GCQ ha ira lalawigan.#
